’சாதிய வன்கொடுமையில் ஈடுபடுபவர்கள் யாரும் ஓட முடியாது’ – அமைச்சர் வன்னிஅரசு எச்சரிக்கை

கோவை மாவட்டம் ஆனைமலை அருகே உள்ள ஒடையகுளம் பேரூராட்சி கவுன்சிலர் விஜயவாணியின் கணவர் முருகன் என்பவரின் கையை, ஆறுச்சாமி என்பவர் கடந்த 23ம் தேதியன்று அரிவாளால் வெட்டினார். இதில் அவரது கை துண்டான நிலையில், கோவை அரசு மருத்துவமனையில் அவரது கைதுமீண்டும் இணைக்கப்பட்டது.

டெங்கு காய்ச்சல் மருந்து அடிக்கும் விவகாரத்தில் சாதிய ஆணவத்தில் இந்த சம்பவம் நடந்ததாக கூறப்படுகிறது. இந்த நிலையில் கோவை அரசு மருத்துவமனையில் சிகிச்சை பெற்று வரும் முருகனை அமைச்சர்கள் வன்னி அரசு, சம்பத்குமார் ஆகியோர் நேரில் சந்தித்து ஆறுதல் தெரிவித்தனர். மேலும் முருகனின் குடும்பத்தினருக்கு ரூ.6 இலட்சம் நிவாரண நிதியையும் அவர்கள் வழங்கினர்.

பின்னர் செய்தியாளர்களிடம் பேசிய அமைச்சர் வன்னிஅரசு, “கடந்த 23ம் தேதியன்று ஆனைமலையில் மிக மோசமான வன்கொடுமை சம்பவம் நடந்தது. டெங்கு காய்ச்சல் மருந்து அடிக்கும் விவகாரத்தில் பேரூராட்சி உறுப்பினரின் கணவர் கை வெட்டப்பட்டது. இந்த விவராகத்தில் காவல் துறை விரைந்து நடவடிக்கை எடுத்து, மறுநாளே குற்றவாளையை கைது செய்தனர். மக்கள் அச்சத்தை போக்கியுள்ளனர்.

எஸ்.சி, எஸ்.டி வன்கொடுமையால் பாதிக்கப்பட்டவர்களுக்கு முதல்கட்டமாக வழக்கமாக 25 சதவீத நிதி மட்டுமே வழங்கப்படும். ஆனால் முதல்முறையாக முழு நிவாரணத் தொகையான ஆறு இலட்சமும் வழங்கப்பட்டுள்ளது. பாதிக்கப்பட்டவருக்கு அரசு சார்பில் முழு சிகிச்சை அளிக்கப்படும்.

பிற்படுத்தப்பட்டோர் நலத்துறை மற்றும் சமூக நீதித் துறை அமைச்சர்கள் தனித்தனியாக இல்லாமல், இருவரும் இணைந்து செயல்படுவது சமூக நல்லிணக்கத்தை காட்டுகிறது. சமூக நல்லிக்கணத்தை உருவாக்கும் அரசாக இருக்கிறது. மக்களை பாதுகாக்கும் அரசாக உள்ளது. இதுபோன்ற சம்பவம் நடக்கக்கூடாது என்ற அடிப்படையில் சட்டப்பூர்வமாக கடுமையான நடவடிக்கைகள் எடுக்கப்படும். இந்த சம்பவத்தில் குற்றவாளியின் மனைவி மீதும் நடவடிக்கை எடுக்கப்படும். கோவை மட்டுமல்லாமல், தமிழ்நாடு முழுக்க வன்கொடுமை சம்பவங்களை கடந்து செல்லாமல் நடவடிக்கை எடுக்கிறோம். யாரும் ஓட முடியாது. யார் தவறு செய்தாலும் நடவடிக்கை எடுக்கப்படும். இதுபோன்ற செயல்களை நிறுத்திக்கொள்ள வேண்டும்” என்றார்.