`விஷமிகளுக்கு ஏமாற்றமே; ரஜினியின் அஸ்திவாரத்தை கலைப்பது எளிதல்ல’ – சோளிங்கர் ரவி பதிலடி

ரஜினிகாந்த் நடிப்பில் வெளியான `ஜெயிலர் 2’ திரைப்படம் பாக்ஸ் ஆபீஸ் வசூல் செய்து `ஹிட்’ அடித்துக் கொண்டிருக்கிறது.

இந்த நிலையில்தான் வன்மத்துடன் கமெண்ட்ஸுகளை பதிவிட்டுவந்த நபர்களுக்கு பதிலடி தரும்விதமாக அறிக்கை ஒன்றை வெளியிட்டிருக்கிறார் ரஜினிகாந்த் ரசிகர் நற்பணி மன்றத்தின் ஒருங்கிணைந்த வேலூர் மாவட்டச் செயலாளரான சோளிங்கர் என்.ரவி.

`ரஜினிகாந்த் என்னும் சகாப்தம்’ என்ற தலைப்பில் அவர் வெளியிட்ட அறிக்கையில், “பழக, பழக பாலும் புளிக்கும். பார்க்க பார்க்க அனைத்தும் சலிக்கும்… ஆனால், 51 வருடங்களாக பார்த்த முகமும், நடிப்பும் இன்றும் நமக்கு சலிக்காமல், வெறுக்காமல் ஒருவரின் காந்த சக்தியால் நம்மை ஈர்த்து கொண்டிருப்பது எவ்வாறு சாத்தியம்? அந்த விடைத் தெரியாத வசீகரம்தான், தலைவர் ரஜினிகாந்த். அவருக்கு மட்டுமே கிடைத்த வரம்; அதனால்தான் அவர் அதியப்பிறவி.

ஒரு நடிகரால் குறைந்தபட்சம் ஒரு தலைமுறையினரை தனது நடிப்பால் கவர செய்வதே… இங்கு கடினமாக இருக்கும் சமயத்தில், 5 தலைமுறையினரை தனது நடிப்பால் இவர் கவர்ந்து கொண்டிருப்பது எப்படி? இது தலைவர் ரஜினிகாந்த்தால் மட்டுமே சாத்தியமான மாயாஜாலம்.

வருடந்தோறும் வதந்திகளை பரப்பி, எண்டு கார்டு போட நினைக்கும் விஷமிகள் தலைவர் ரஜினிகாந்த்தின் எனர்ஜிமிக்க வெற்றியைப் பார்த்து ஏமாற்றமே அடைந்திருக்கிறார்கள். தலைவர் மீது பல அவதூறுகளை சுமத்தியும் 51 வருடங்களாக அவரை வீழ்த்த முடியாமல் போனது எப்படி? எந்த காலத்திலும் அவர் மீது பிறர் போடும் பழிகளாலும், சில படத்தின் தோல்விகளாலும் அவரின் வீழ்ச்சியை நிர்ணயித்துவிட முடியாது.

ஏனென்றால், தலைவர் ரஜினிகாந்த் என்ற மனிதர் வெற்றிபெறும் முன்பு தனது அஸ்திவாரத்தை தன்னந்தனியான முயற்சியுடனும், கடின உழைப்பு, தனித்துவம், ஸ்டைல், துணிவு போன்றவைகளால் உருவாக்கி, வெற்றி பின்னரும் ஆணவமற்ற, எளிமை, பணிவு போன்றவைகளால் தனது அடையாளத்தை பலப்படுத்திக்கொண்டே இருக்கிறார். தலைவரின் அஸ்திவாரத்தை கலைப்பது அவ்வளவு எளிதல்ல.

எவரையும் வஞ்சிக்காமல் தனக்கான குறிக்கோளை நோக்கி தன் வழியில் அவர் இன்றும் பயணித்துக் கொண்டிருக்கிறார். சறுக்கல்களைச் சந்தித்தாலும் தனக்கான சவால்களை சளைக்காமல் எதிர்கொண்டு, சரிந்துவிடாமல் சாதனை படைத்து வரும் சரித்திரம்தான் தலைவர் ரஜினிகாந்த் என்னும் சகாப்தம்” என்று குறிப்பிட்டிருக்கிறார் சோளிங்கர் என்.ரவி.