அவுட்லுக், டீம்ஸ் மீண்டும் இயல்பு நிலைக்குத் திரும்புமா? Microsoft புதிய அப்டேட்!

உலகம் முழுவதும் லட்சக்கணக்கான பயனர்களின் சேவைகளைப் பாதித்த மைக்ரோசாப்ட் 365 தொழில்நுட்பக் கோளாறு தற்போது படிப்படியாகச் சீராகி வருகிறது.

இருந்தாலும், நவம்பர் 12-ம் தேதி இரவு சுமார் 11:30 மணிக்குத் தொடங்கிய இந்தச் சேவை முடக்கம், 16 மணி நேரத்திற்கும் மேலாகியும் இன்னும் முழுமையாகச் சரிசெய்யப்படவில்லை.

மைக்ரோசாப்ட் வெளியிட்டுள்ள சமீபத்திய தகவலின்படி, “சேவைகளை மீட்டெடுப்பதில் கூடுதல் முன்னேற்றம் ஏற்பட்டுள்ளது” என்றும்,

ஆசிய-பசிபிக் பிராந்தியத்தில் பாதிக்கப்பட்ட உள்கட்டமைப்பின் சில பகுதிகளில் சீரமைப்புப் பணிகள் நிறைவடைந்துவிட்டதாகவும் தெரிவிக்கப்பட்டுள்ளது.

டிராஃபிக்கை படிப்படியாகச் சீர்செய்து வருவதோடு, மெயில்பாக்ஸ் மற்றும் தாமதமாகும் மின்னஞ்சல்களைச் சரிசெய்வது ஆகியவை தற்போது நடந்து வருகிறது என்றும் கூறப்படுகிறது.

இருந்தாலுமே, சில பயனர்களுக்கு அவ்வப்போது சிறிய இடையூறுகள் தொடர வாய்ப்புள்ளது. மைக்ரோசாப்ட் தனது மீட்புப் பணிகளை மற்ற பிராந்தியங்களுக்கும் விரிவுபடுத்தி வருகிறது.

மேலும், சேவையின் நிலைத்தன்மையை மேம்படுத்தக் கூடுதல் சர்வர் திறனையும் இணைத்து வருகிறது. சேவை எப்போது முழுமையாகச் சீராகும் என்பதற்கான காலக்கெடுவை நிறுவனம் இன்னும் அறிவிக்கவில்லை.

இந்தச் சேவை முடக்கத்தால் அவுட்லுக், மைக்ரோசாப்ட் டீம்ஸ், எக்ஸ்சேஞ்ச் ஆன்லைன், ஷேர்பாயிண்ட் ஆன்லைன், மைக்ரோசாப்ட் 365 கோபைலட், ஒன்ட்ரைவ் உள்ளிட்ட பல சேவைகள் பாதிக்கப்பட்டன.

இந்தியாவில், இண்டிகோ மற்றும் ஆகாசா ஏர் ஆகிய விமான நிறுவனங்களும் தங்களது மின்னஞ்சல் ஆதரவு சேவைகளில் இடையூறு ஏற்பட்டதாகத் தெரிவித்திருந்தன.

எதிர்பாராத சர்வர் கோளாறுகளால், எஞ்சியிருந்த சர்வர்களால் பணிச்சுமையைத் தாங்க முடியாமல் போனதே இந்த முடக்கத்திற்குக் காரணம் என்று மைக்ரோசாப்ட் தெரிவித்துள்ளது.

இதில் சைபர் தாக்குதலோ அல்லது தீங்கிழைக்கும் செயல்பாடுகளோ நடந்ததற்கான எந்த அறிகுறியும் இல்லை என்றும் அந்நிறுவனம் தெளிவுபடுத்தியுள்ளது.

அனைத்துச் சேவைகளும் முழுமையாக மீட்டெடுக்கப்பட்ட பிறகு, இந்தக் கோளாறுக்கான அடிப்படைக் காரணத்தை விளக்கும் விரிவான அறிக்கையை வெளியிடுவதாக மைக்ரோசாப்ட் உறுதியளித்துள்ளது.

More in Technology