டெல்லி: `ஜந்தர் மந்தரில் போராட்டங்களுக்குத் தடை' – மத்திய அரசின் முடிவுக்கு எதிர்க்கட்சிகள் கண்டனம்!

டெல்லியில் இதுவரை முதன்மைப் போராட்டக் களமாக இருந்த மத்திய டெல்லியின் ஜந்தர் மந்தர் பகுதி இனி போராட்டங்களுக்காகப் பயன்படுத்தப்படாது என
மத்திய உள்துறை அமைச்சகத்தின் கீழ் அமைக்கப்பட்ட பரிந்துரைக் குழுவின் அறிக்கையின் அடிப்படையில் மத்திய அரசு முடிவெடுத்திருக்கிறது. SIR விவகாரம் தொடர்பாக, தலைமை தேர்தல் ஆணையர் ஞானேஷ் குமாருக்கு எதிராக ‘இந்தியா’ கூட்டணி மற்றும் ‘காக்ரோச் ஜனதா கட்சி’ (CJP) ஆகியவை மத்திய டெல்லியில் போராட்டம் நடத்தி வரும் சூழலில் இந்த அறிவிப்பு வெளியாகியுள்ளது.

இது தொடர்பாக டெல்லி காவல் ஆணையர் அனுராக் குமார் பிறப்பித்துள்ள உத்தரவில். “ பரிந்துரைக் குழுவின் பரிந்துரைகளின் அடிப்படையில், ஜந்தர் மந்தர், போராட்ட இடப் பட்டியலிலிருந்து நீக்கப்பட்டுள்ளது. அதற்குப் பதிலாக ராம்லீலா மைதானம், புராாி மைதானம் மற்றும் கிழக்கு டெல்லியின் சிபிடி மைதானம் ஆகியவை புதிய போராட்டக் களங்களாக அறிவிக்கப்பட்டுள்ளன. மேலும், இந்த புதிய 3 இடங்களில் போராட்டங்களை நடத்துவதற்கான நிலையான வழிகாட்டு நெறிமுறைகள் (SOP) தனியாக வெளியிடப்படும்” எனத் தெரிவிக்கப்பட்டிருக்கிறது.

ஜந்தர் மந்தர் பகுதி முக்கிய அரசு அலுவலகங்களுக்கு அருகே அமைந்துள்ளதால், இந்த மாற்றத்தின் மூலம் அப்பகுதியில் போக்குவரத்து நெரிசல் குறைந்து பொதுமக்கள் பயன்பாடு சீராகும் என எதிர்பார்க்கப்படுகிறது. அதேவேளையில், ஜனநாயகப் பூர்வமான போராட்டங்களை ஒடுக்குவதற்காகவே மத்திய அரசு இத்தகைய நடவடிக்கையை எடுத்துள்ளதாக எதிர்க்கட்சிகள் விமர்சிக்கக்கூடும். டெல்லி காவல்துறை மத்திய உள்துறை அமைச்சகத்தின் கீழ் செயல்படுகிறது என்பது குறிப்பிடத்தக்கது.

காங்கிரஸ் கட்சியின் பொதுச் செயளாலர் ஜெய்ராம் ரமேஷ், “பிரதமர் – உள்துறை அமைச்சர் ஆகிய இருவரையும் எந்த அளவுக்குக் கடுமையான பீதி ஆட்கொண்டிருக்கிறது என்பதற்கு, நமது ஜனநாயகத்திற்குத் தினமும் புத்துயிரூட்டி வந்த வரலாற்றுச் சிறப்புமிக்க ஜந்தர் மந்தர் இனி போராட்டக் களமாக இருக்காது என்ற அறிவிப்பே தெளிவான சான்றாகும்.
அதிகார போதையில் இருக்கும் இந்த நச்சு இணை, கடந்த சில நாட்களாக அமைதியான முறையில் நடைபெற்ற மக்கள் போராட்டங்களை எவ்வளவு கொடூரமாகக் கையாண்டது என்பதை நாம் பார்த்தோம். இவர்களுக்கு இனி ஜனநாயகம் முக்கியமில்லை. நாற்காலி அதிகாரமே இவர்களுக்கு எல்லாம்.” எனக் குறிப்பிட்டிருக்கிறார்.