`வேலை பறிபோனால் என்ன செய்யலாம்? உங்கள் உரிமைகள் என்னென்ன?' சட்டம் சொல்வது என்ன? – 10

“நாளையிலிருந்து நீங்கள் வேலைக்கு வர வேண்டாம்!”

இந்த ஒற்றை வாக்கியம் ஒரு மனிதனின் ஒட்டுமொத்த உலகத்தையும் சில நொடிகளில் உலுக்கிப் போட்டுவிடும். மாதச் சம்பளம் நின்றுபோனால் குடும்பத்தை எப்படி நடத்துவது, அடுத்த வேலைக்கு எங்கு செல்வது, EMI கட்ட என்ன செய்வது எனப் பல கேள்விகள் எழும்.

ஆனால், ஒரு நிறுவனம் நினைத்த மாத்திரத்தில் சட்டென உங்களை வெளியேற்றிவிட முடியுமா? அப்படிச் செய்தால் உங்களுக்கு என்னென்ன உரிமைகள் உள்ளன?

திடீரென வேலையைப் பறிக்க முடியுமா?

தமிழ்நாடு கடைகள் மற்றும் நிறுவனங்கள் சட்டம், 1947-ன் பிரிவு 41-ன்படி, அந்தச் சட்டம் பொருந்தும் கடை அல்லது நிறுவனத்தில் குறைந்தது ஆறு மாதங்கள் தொடர்ந்து பணியாற்றியவரின் சேவையை நியாயமான காரணமின்றி முடிவுக்குக் கொண்டுவர முடியாது.

பொதுவாக, ஒரு மாத நோட்டீஸ் கொடுக்க வேண்டும் அல்லது அதற்குப் பதிலாக ஒரு மாதச் சம்பளம் வழங்க வேண்டும். ஆனால், விசாரணையில் போதுமான ஆதாரங்களுடன் நிரூபிக்கப்பட்ட ஒழுங்கீனக் குற்றச்சாட்டு போன்ற விதிவிலக்குகளும் உண்டு.

இந்தப் பிரிவின் கீழ், பணிநீக்கத்தை எதிர்த்து உரிய மேல்முறையீட்டு அதிகாரியிடம் மேல்முறையீடு செய்யும் உரிமையும் பணியாளருக்கு உண்டு

வேலையிலிருந்து நீக்கப்பட்டால் இழப்பீடு கிடைக்குமா?

தொழில்துறை உறவுகள் சட்டத் தொகுப்பு, 2020 (Industrial Relations Code, 2020)-ன் பிரிவு 70, சட்டத்தில் வரையறுக்கப்பட்டுள்ள “worker” மீது மேற்கொள்ளப்படும் ஆட்குறைப்பு (retrenchment) நடவடிக்கைக்கான நிபந்தனைகளை விதிக்கிறது.

குறைந்தது ஓராண்டு தொடர்ச்சியாகப் பணியாற்றிய தகுதியுள்ள தொழிலாளருக்கு, பொதுவாக ஒரு மாத எழுத்துப்பூர்வ நோட்டீஸ் அல்லது அதற்கான சம்பளம் வழங்க வேண்டும்.

மேலும், ஒவ்வொரு முழுமையான பணியாண்டுக்கும் 15 நாட்களின் சராசரிச் சம்பள அடிப்படையில் இழப்பீடு வழங்க வேண்டும். ஆறு மாதங்களுக்கு மேல் உள்ள கூடுதல் பணிக்காலமும் கணக்கில் எடுத்துக்கொள்ளப்படும்.

உரிய அரசுத் துறைக்கு நோட்டீஸ் அளிப்பதும் அவசியம். இது எல்லா வகையான பணிநீக்கங்களுக்கும் தானாகப் பொருந்தும் என்று நினைக்கக் கூடாது.

பணிநீக்கத்தின் தன்மை, பணியாளரின் பணிப் பொறுப்புகள், பணிக்காலம் மற்றும் சட்டத்தில் உள்ள விதிவிலக்குகள் ஆகியவற்றைப் பொறுத்தே இந்த இழப்பீடு கிடைக்குமா என்பது தீர்மானிக்கப்படும்

நிலுவையில் உள்ள சம்பளம் எப்போது கிடைக்க வேண்டும்?

ஊதியச் சட்டத் தொகுப்பு, 2019-ன் பிரிவு 17(2)-ன்படி, பணிநீக்கம், ஆட்குறைப்பு, ராஜினாமா அல்லது நிறுவனம் மூடப்படுவதால் வேலை இழத்தல் போன்ற குறிப்பிட்ட சூழல்களில், வழங்க வேண்டிய நிலுவை ஊதியம் இரண்டு வேலை நாட்களுக்குள் வழங்கப்பட வேண்டும்.

இந்தக் காலக்கெடு எல்லா இறுதிப் பணப் பலன்களுக்கும் பொருந்தும் என்று அர்த்தமல்ல. கிராஜுவிட்டி, பயன்படுத்தப்படாத விடுப்புக்கான பணம் உள்ளிட்ட பிற பலன்களுக்கு, அவற்றைப் பொருந்தும் சட்டங்களின் கீழ் தனித்தனி காலக்கெடுகள் இருக்கலாம்.

இப்போது என்ன செய்ய வேண்டும்?

பணிநீக்கக் கடிதம், நியமனக் கடிதம், சம்பளச் சீட்டுகள், வங்கிப் பரிவர்த்தனை விவரங்கள் போன்றவற்றைப் பாதுகாத்து வையுங்கள். பணிநீக்கத்துக்கான காரணம் தெரிவிக்கப்பட்டிருந்தால், அதற்கான மின்னஞ்சல்கள் மற்றும் பிற தகவல்களையும் சேமித்து வையுங்கள்.

நிலுவைச் சம்பளம் அல்லது உரிய இழப்பீடு கிடைக்காவிட்டால், முதலில் எழுத்துப்பூர்வமாகக் கேளுங்கள்; தீர்வு கிடைக்காவிட்டால் சம்பந்தப்பட்ட தொழிலாளர் துறையை அணுகுங்கள்.

முக்கியம்: எந்தச் சட்டம் பொருந்தும் என்பது உங்கள் வேலை, நிறுவனத்தின் தன்மை, பணிக்காலம், பணிநீக்கத்துக்கான காரணம் மற்றும் உங்கள் பணிப் பொறுப்புகள் ஆகியவற்றைப் பொறுத்தது. புரியாமல் எந்த ஆவணத்திலும் கையெழுத்திடாதீர்கள்.

உங்கள் உரிமைகளைத் தெரிந்துகொள்வதே அடுத்த கட்டத்தைத் தைரியமாக எதிர்கொள்ளும் முதல் படி.!

More in TamilNews

`லயோலா மணி புகார் கொடுத்திருக்கணும்; அமைச்சருக்கே விழிப்புணர்வு இல்லையா?'- வழக்கறிஞர் சொல்வது என்ன? November 5, 2026 US Elections: அமெரிக்க செனட் வரலாற்றில் முதல் தன்பாலின ஈர்ப்பாளர்; இணையுடன் மேடையேறிய கிறிஸ் பப்பாஸ் November 5, 2026 இடைத்தேர்தல் ரேஸ்: ED போடும் பிரஷர்… விராலிமலையை வசமாக்க முயற்சியில் 'ரசகுல்லா' விஜயபாஸ்கர்! November 5, 2026 6am Special Show: "பொழுதுபோக்குக்கு முன்னுரிமை கொடுத்து எந்தச் சமூகம் வளர்ந்திருக்கிறது?" – சீமான் November 5, 2026 வாளுடன் வன்முறை வீடியோ: 34 வழக்குகள், 9 கைது, 210 அக்கவுண்ட்கள் முடக்கம்; சிவகங்கையில் அதிரடி November 5, 2026 'முதலமைச்சரே மாணவர்களிடம் பாரபட்சம் காட்டலாமா?' – சர்ச்சையாகும் தவெகவின் கல்வி விருது! November 5, 2026

See all 604 in TamilNews →

Latest News

Madras High Court grants anticipatory bail to Chennai Press Club president, two other journalists November 5, 2026 `லயோலா மணி புகார் கொடுத்திருக்கணும்; அமைச்சருக்கே விழிப்புணர்வு இல்லையா?'- வழக்கறிஞர் சொல்வது என்ன? November 5, 2026 தீபாவளி லீவுக்கு மழை இருக்குமா? சென்னை வானிலை மையம் கொடுக்க முக்கிய அப்டேட்! November 5, 2026 US Elections: அமெரிக்க செனட் வரலாற்றில் முதல் தன்பாலின ஈர்ப்பாளர்; இணையுடன் மேடையேறிய கிறிஸ் பப்பாஸ் November 5, 2026 How the work of two Nobel Prize winners can guide policy in an uncertain world November 5, 2026 ‘Vetri Special Vegetables Kit’ with 10 varieties launched in Tamil Nadu at ₹100 November 5, 2026