US Mid-Term Elections Explained: தப்புவாரா ட்ரம்ப்? – நவம்பர் 3, AMERICA-வில் என்ன நடக்கும்?

“அமெரிக்காவில் ஒரு தேர்தல்… அதில் டிரம்ப் நேரடியாக போட்டியிட இல்லை தான். ஆனால் அவர் எதிர்காலமே அதில்தான் இருக்கிறது! நவம்பர் 3-ல் அமெரிக்காவில் என்ன நடக்கப்போகிறது? இந்த தேர்தலில் Trump-ன் குடியரசுக் கட்சி வென்றால்… தோற்றால் என்ன நடக்கும்… விரிவாக பார்க்கலாம்.!

நவம்பர் 3 ஏன் முக்கியம்?

நவம்பர் 3, அமெரிக்க அரசியலில் ஒரு முக்கியமான நாள். அதிபர் டொனால்ட் ட்ரம்பின் பெயர் வாக்குச்சீட்டில் இல்லை தான். ஆனால் சுமார் 21 கோடி வாக்காளர்கள், அமெரிக்க காங்கிரஸின் கட்டுப்பாடு யார் கையில் இருக்க வேண்டும் என்பதை அன்று முடிவு செய்யவிருக்கிறார்கள். இது ட்ரம்பின் இரண்டாண்டு கால ஆட்சி மீதான மக்கள் தீர்ப்பாகவே பார்க்கப்படுகிறது. அவரது பதவிக்காலத்தின் மீதமுள்ள இரண்டு ஆண்டுகளில், தனது கொள்கைகளைச் செயல்படுத்த அவருக்கு எவ்வளவு சுதந்திரம் கிடைக்கும் என்பதையும் இந்தத் தேர்தல் தீர்மானிக்கும்.

இடைக்காலத் தேர்தல் என்றால் என்ன?

அதிபரின் நான்காண்டு பதவிக்காலத்தின் பாதியில் இந்தத் தேர்தல் நடைபெறுகிறது, அதனால் இதில் அதிபர் தேர்தல் கிடையாது. நிர்வாகத்தைப் பற்றி மக்கள் என்ன நினைக்கிறார்கள் என்பதை வாக்குகள் மூலம் வெளிப்படுத்தவும், காங்கிரஸை எந்தக் கட்சி கட்டுப்படுத்த வேண்டும் என்பதைத் தீர்மானிக்கவும் இது வாய்ப்பளிக்கிறது.

இந்தியாவின் மக்களவை, மாநிலங்களவை போலவே, அமெரிக்க காங்கிரஸும் இரண்டு அவைகளைக் கொண்டது.

பிரதிநிதிகள் சபை: 435 உறுப்பினர்கள். இவர்கள் அனைவரும் இரண்டு ஆண்டுகளுக்கு ஒருமுறை தேர்தலைச் சந்திக்கிறார்கள்.

செனட்: 100 உறுப்பினர்கள். பதவிக்காலம் ஆறு ஆண்டுகள். சுழற்சி முறையில் இரண்டு ஆண்டுகளுக்கு ஒருமுறை குறிப்பிட்ட இடங்களுக்கு மட்டும் தேர்தல் நடக்கும். இந்த முறை 35 இடங்களுக்கு வாக்குப்பதிவு.

இந்த இரு அவைகளும் சட்டங்களை இயற்றுகின்றன, மத்திய பட்ஜெட்டை நிறைவேற்றுகின்றன, பதவி நீக்கத் தீர்மான அதிகாரங்களையும் கொண்டுள்ளன.

அமைச்சரவை, கூட்டாட்சி நீதிபதிகள், உச்ச நீதிமன்ற நீதிபதிகள் ஆகியோருக்கான அதிபரின் பரிந்துரைகளை செனட் அவை உறுதி செய்கிறது அல்லது நிராகரிக்கிறது.

வரலாற்றில் இடைக்காலத் தேர்தல்கள் ஆளும் கட்சிக்குக் கடினமான சோதனையாகவே இருந்துள்ளன. 1946 முதல், அதிபரின் கட்சி சராசரியாக பிரதிநிதிகள் சபையில் 26 இடங்களை இழந்துள்ளது.

ட்ரம்ப் சார்ந்திருக்கும் கட்சி குடியரசுக் கட்சி (Republican Party). நிறம் சிவப்பு.
எதிர்க்கட்சியான ஜனநாயகக் கட்சி (Democratic Party), நிறம் நீலம்.

தற்போதைய நிலை: குடியரசுக் கட்சியின் வசமே!

தற்போது குடியரசுக் கட்சி செனட்டில் 53 இடங்களையும், பிரதிநிதிகள் சபையில் 218 இடங்களையும் வைத்துள்ளது. அதிபரும் அதே கட்சி என்பதால், கடந்த இரண்டு ஆண்டுகளாக பெரிய எதிர்ப்பின்றி தனது கொள்கைகளை டிரம்ப் செயல்படுத்த முடிந்தது. சில முக்கிய சட்டங்கள் இந்தப் பெரும்பான்மையால் நிறைவேறின.

பிரதிநிதிகள் சபை: கத்தி மேல் நடக்கும் குடியரசுக் கட்சி

குடியரசுக் கட்சியின் தற்போதைய பெரும்பான்மை என்பது மிக மெல்லியது. ஜனநாயகக் கட்சி கூடுதலாக வெறும் மூன்று இடங்களை வென்றாலே சபையைக் கைப்பற்றிவிடும்.

பெரும்பாலான தேர்தல் கணிப்புகள், ஜனநாயகக் கட்சி சுமார் 15 இடங்கள் கூடுதலாக வென்று பெரும்பான்மை பெறும் என எதிர்பார்க்கின்றன. இதனால் பிரதிநிதிகள் சபை தேர்தல் இந்த முறை அதிக கவனம் பெற்றுள்ளது.

செனட்: ஜனநாயகக் கட்சிக்கு இமாலய இலக்கு

செனட்டைக் கைப்பற்றுவது ஜனநாயகக் கட்சிக்கு மிகப்பெரிய சவாலாக அமையும். மொத்தம் உள்ள 100 இடங்களில் தற்போது காலியாகும் 35 இடங்களுக்குத் தேர்தல் நடக்கிறது.

தற்போதைய நிலையில் குடியரசுக் கட்சி 53 இடங்களுடன் வலுவாக உள்ளது. பெரும்பான்மைக்கு ஜனநாயகக் கட்சிக்கு 51 இடங்கள் தேவை. தற்போது தேர்தல் நடக்கும் 35 இடங்களில் தங்களிடம் உள்ள இடங்களைத் தக்கவைத்துக்கொண்டு, குடியரசுக் கட்சியிடமிருந்து கூடுதலாக 4 இடங்களைப் பறிக்க வேண்டும்.

ஒருவேளை 50-50 என்ற சமநிலை ஏற்பட்டால், துணை அதிபர் ஜே.டி. வான்ஸின் வாக்கு குடியரசுக் கட்சிக்கே சாதகமாக அமையும்.

இரு கட்சிகளின் பிரச்சார வியூகம்

ட்ரம்ப் தரப்பு – குடியரசு கட்சி: இடைத்தேர்தலுக்கு முன் டீசல் விலையைக் கட்டுப்படுத்த, ரஷ்ய டீசல் ஏற்றுமதி மீதான தடைகளை டிரம்ப் நிர்வாகம் தற்காலிகமாக நீக்கியது. இது ரஷ்யாவை நிதி ரீதியாக பலவீனப்படுத்தும் அவர்களின் சொந்தக் கொள்கைக்கே முரணானது. மேலும், தனது கட்சி இரு அவைகளிலும் கட்டுப்பாட்டைத் தக்கவைத்தால் அனைத்து அமெரிக்கக் குடிமக்களுக்கும் $5,000 மதிப்பிலான “டிரம்ப் டிவிடெண்ட்” காசோலை வழங்கப்படும் என்றும் வாக்குறுதி அளித்துள்ளார்.

ஜனநாயகக் கட்சி: டிரம்பின் வர்த்தக வரிகளையும் கனடாவுடனான வர்த்தக மோதல்களையும் கடுமையாக விமர்சிக்கிறது; இவை பொருளாதாரத்தைப் பாதித்ததாக வாதிடுகிறது. குடியேறிகள் மீதான கடுமையான நடவடிக்கைகளால் சிறுபான்மை சமூகத்தினரிடையே அரசியல் ஆதாயம் கிடைக்கும் என்றும் நம்புகிறது.

ஜனநாயகக் கட்சி வென்றால்

பிரதிநிதிகள் சபை மட்டும் கைமாறினாலும், குடியரசுக் கட்சியின் சட்ட மசோதாக்களைத் தடுக்க முடியும். நாடாளுமன்றக் குழுக்களின் தலைமையை ஏற்று, டிரம்ப் குடும்பத்தின் மீதான ஊழல் குற்றச்சாட்டுகள் உட்பட பலவற்றில் விசாரணைகளைத் தொடங்கலாம்.

பதவி நீக்கத் தீர்மானம்: சாதாரண பெரும்பான்மையுடன் பிரதிநிதிகள் சபை அதிபரைப் பதவி நீக்க வாக்களிக்க முடியும். ஆனால் செனட்டில் மூன்றில் இரண்டு பங்கு பெரும்பான்மையுடன் குற்றம் நிரூபிக்கப்பட்டால்தான் அவர் பதவியிலிருந்து நீக்கப்படுவார். கட்சி கட்டுப்பாட்டை இழந்தால், தனக்கு எதிராக மூன்றாவது முறையாக பதவி நீக்கத் தீர்மானம் வரும் என்ற கவலையை டிரம்ப் ஏற்கெனவே வெளிப்படுத்தியுள்ளார்.

செனட்டும் கைமாறினால், ட்ரம்ப் பரிந்துரைக்கும் நீதிபதிகள், அமைச்சர்கள், தூதர்கள் நியமனங்களை நிராகரிக்க முடியும். இது அவரது பதவிக்காலத்துக்கு அப்பாலும் நீடிக்கும் தாக்கத்தை ஏற்படுத்தும்.

அரசு முடக்க அழுத்தம்: அரசு முடங்கும் அபாயத்தைக் காட்டி, அத்தியாவசிய நிதி மசோதாக்களில் தங்கள் கொள்கைகளைச் சேர்க்க அழுத்தம் கொடுக்கலாம்.

குடியரசுக் கட்சி வென்றால்

பெரும்பான்மையைத் தக்கவைத்தால் டிரம்பின் திட்டங்கள் தொடரும்.

டிரம்ப் மூன்றாவது முறை போட்டியிட முடியாது என்பதால், 2028 தேர்தலைக் கருத்தில் கொண்டு சில குடியரசுக் கட்சி உறுப்பினர்கள் அவருக்கு எதிராகச் செயல்படத் தொடங்கலாம்.

பிரதிநிதிகள் சபையை இழந்து செனட்டை மட்டும் தக்கவைத்தாலும், உச்ச நீதிமன்ற நீதிபதிகள் உட்பட முக்கிய நியமனங்களை குடியரசுக் கட்சியால் உறுதி செய்ய முடியும்.

ஜனநாயகக் கட்சிக்கும் உள்ள தடைகள்: வீட்டோ

இரு அவைகளையும் வென்றாலும் ஜனநாயகக் கட்சியால் முழு அதிகாரம் செலுத்த முடியாது.

வீட்டோ: டிரம்ப் தனது வீட்டோ அதிகாரத்தால் சட்டங்களை ரத்து செய்ய முடியும். அதை மீற இரு அவைகளிலும் மூன்றில் இரண்டு பங்கு பெரும்பான்மை தேவை. இது மிக அரிதான நிகழ்வு.!

முடிவுகள் எப்போது தெரியும்?

முடிவுகள் நவம்பர் 3 இரவு முதலே வரத் தொடங்கினாலும், முழுமையான முடிவுகள் தெரிய சில நாட்கள் அல்லது வாரங்கள் கூட ஆகலாம். தபால் வாக்குகள் எண்ணப்படும் விதத்தைப் பொறுத்து, ஆரம்பகட்ட முடிவுகள் தவறான பிம்பத்தைக் காட்டக்கூடும். எனவே அவசரப்பட்டு முடிவுக்கு வராமல் காத்திருக்க வேண்டும்.

இந்தத் தேர்தல் பொருளாதாரம், ஈரான் போர் போன்ற விஷயங்களில் உடனடி மாற்றத்தைக் கொண்டு வராமல் போகலாம். ஆனால் அடுத்த இரண்டு ஆண்டுகளுக்கான அமெரிக்க அரசியல் களத்தை முழுமையாக மாற்றியமைக்கும் ஆற்றல் கொண்டது.

அமெரிக்க மக்கள் டிரம்பின் சிறகுகளை முறிப்பார்களா, அல்லது அவருக்கு மேலும் பலம் சேர்ப்பார்களா என்பதே இப்போதைய மில்லியன் டாலர் கேள்வி.!