இசைஞானி இளையராஜாவின் 50 ஆண்டு சாதனை; ஆஸ்திரேலிய நாடாளுமன்றத்தில் கிடைத்த அரிய கௌரவம்!

ஒரு நாட்டுடைய பாராளுமன்ற மன்றத்தில் பிற நாட்டு இசைக் கலைஞருக்குச் சிறப்பு அங்கீகாரம் அளிக்கப்படுவது உலக வரலாற்றிலேயே மிக அரிதான நிகழ்வு.

தனது முதல் படமான அன்னக்கிளி (1976) மூலம் திரையிசையில் காலடி எடுத்து வைத்து, அரை நூற்றாண்டு காலமாகப் பல தலைமுறைகளின் இதயங்களைத் தனது மெல்லிசையால் கட்டிப்போட்டவர் இசைஞானி இளையராஜா. 50 ஆண்டுகால இந்த இணையற்ற இசைப் பயணத்தைக் கொண்டாடும் விதமாக, ஆஸ்திரேலிய அரசு அவருக்குச் சிறப்புத் தபால் தலை வெளியிட்டுப் பெருமைப்படுத்தியுள்ளது.

அது என்ன ‘சிறப்புத் தபால் தலை’?

அரசாங்கங்கள் அல்லது நாடாளுமன்றங்கள் உலகளாவிய முக்கியத்துவம் வாய்ந்த ஆளுமைகளுக்கோ அல்லது வரலாற்றுச் சிறப்புமிக்க நிகழ்வுகளுக்கோ வழக்கமான அஞ்சல் பயன்பாட்டைத் தாண்டி, ஒரு மதிப்புறு நினைவுச் சின்னமாக இத்தகைய தபால் தலைகளை வெளியிடுவது வழக்கம்.

இந்தத் தபால் தலையில் இளையராஜாவின் உருவமும், அவரது ஐந்து தசாப்த சாதனையை நினைவுகூரும் வாசகங்களும் இடம்பெற்றுள்ளன. இது வழக்கமான கடிதப் போக்குவரத்தை விட, அருங்காட்சியக மதிப்புடைய ஒரு நினைவுச் சின்னமாகப் போற்றப்படுகிறது.

I offer my sincere gratitude to the Honorable Enver Erdogan MP, Minister for Finance, Victorian Government, and the Members of Parliament for having my 50-year journey commemorated through a ceremonial stamp release. Being born in a small, remote village in Tamil Nadu and honored… pic.twitter.com/QXl4yQZURi

— Ilaiyaraaja (@ilaiyaraaja) September 22, 2026

நாடாளுமன்றத்தில் நடந்த வெளியீடு

ஆஸ்திரேலியாவின் விக்டோரியா மாகாண நிதி அமைச்சர் என்வர் எர்டோகன் (Enver Erdogan) மற்றும் அந்நாட்டு நாடாளுமன்ற உறுப்பினர்கள் முன்னிலையில் இந்தச் சிறப்பு அஞ்சல் தலை வெளியிடப்பட்டது.

இந்த அங்கீகாரத்தைப் பெற்றுக்கொண்ட இளையராஜா தனது அதிகாரபூர்வ எக்ஸ் பக்கத்தில் “தமிழ்நாட்டின் ஒரு சிறிய, தொலைதூரக் குக்கிராமத்தில் பிறந்து, இன்று ஆஸ்திரேலிய நாடாளுமன்றத்தில் இந்தக் கௌரவத்தைப் பெற்றிருப்பது என்னை நெகிழச் செய்கிறது.

என் இசைக்கு உயிர் கொடுத்த எண்ணற்ற மக்களுக்கும், என்னுடன் பயணித்த கலைஞர்களுக்கும், தலைமுறை கடந்து என் இசையை ஏற்றுக்கொண்ட ரசிகர்களுக்கும் என் மனமார்ந்த நன்றிகள்” என நெகிழ்ச்சியுடன் பதிவிட்டார்.

உலகளாவிய இசைச் சுற்றுப்பயணம்

இளையராஜா தனது 50-வது ஆண்டைக் கொண்டாடும் விதமாக உலக நாடுகளுக்கு நேரடி இசைக்கச்சேரி சுற்றுப்பயணம் மேற்கொண்டு வருகிறார். வட அமெரிக்கப் பயணத்தைத் தொடர்ந்து, ஆஸ்திரேலியாவின் சிட்னி (செப்டம்பர் 26) மற்றும் பிரிஸ்பேன் (அக்டோபர் 5) நகரங்களில் பிரமாண்ட இசை நிகழ்ச்சிகளை நடத்துகிறார்.

தொடரும் சர்வதேச சாதனைகள்

சமீபத்தில் இளையராஜா இசையமைத்த மராத்தி திரைப்படமான கோந்தல் (Gondhal), ஆஸ்கர் விருதுக்கான இந்தியாவின் அதிகாரபூர்வ நுழைவுப் படமாக (Best International Feature Film category) தேர்வு செய்யப்பட்டுள்ளது.

கார்த்திக் சுப்பராஜ் இயக்கத்தில் இளையராஜா இசையமைத்துள்ள டோரதி திரைப்படம் டொராண்டோ திரைப்பட விழாவில் (TIFF) பெரும் வரவேற்பைப் பெற்று தற்போது திரைக்கு வரவுள்ளது.

தேனி மாவட்டத்தின் பண்ணைப்புரம் என்ற சிறிய கிராமத்தில் தாரை தப்பட்டை, ஹார்மோனியத்துடன் புறப்பட்ட ஒரு கிராமத்து இளைஞன், தனது நுட்பமான இசையால் இந்திய எல்லைகளைத் தாண்டி, சிம்பொனி இசையமைத்து, இன்று ஆஸ்திரேலிய நாடாளுமன்றமே எழுந்து நின்று தபால் தலை வெளியிட்டு வணங்கும் அளவிற்கு உயர்ந்திருப்பது தமிழ் மொழிக்கும் ஒட்டுமொத்த இந்தியத் திரையுலகிற்கும் கிடைத்த மாபெரும் பெருமை.